Saga gulls í 6000 ár

Frá örófi alda hefur gull verið tengt hinu yfirnáttúrulega. Fegurð þess hefur heillað fólk á öllum tímum. Ekkert annað efni í náttúrunni líkist gulli að lit, ljóma og áferð. Í aldanna rás hefur mannkynið smíðað úr því sína verðmætustu gripi.



Gull er fágætt. Væri það jafn algengt og sandur eða salt hefði það aldrei notið sömu virðingar eða verið jafn eftirsótt. Nær allt það gull sem unnið hefur verið úr jörðu er enn til.

Gull býr yfir einstökum eiginleikum. Úr einni únsu af gulli (31,1 g) má draga allt að 80 kílómetra langan vír. Einnig má hamra það í blaðgull sem er aðeins tveir milljónustu úr sentimetra að þykkt. Lítið magn af gulli getur því nýst ótrúlega vel.

Gull ryðgar hvorki né tærist og missir ekki ljóma sinn. Það er afar hvarftregt og hvorki vatn né loft hafa áhrif á það. Fáar sýrur vinna á því. Gullgripur getur því legið í jörðu í þúsundir ára og verið jafn fagur og gljáandi og daginn sem hann var smíðaður.

Það er því engin furða að þetta einstaka náttúruefni hafi löngum verið talið búa yfir yfirnáttúrulegum eiginleikum, enda virðist það endast að eilífu. Um aldir hefur fólk treyst gulli betur en flestu öðru þegar óvissutímar hafa gengið yfir og fátt bendir til annars en að svo verði einnig í framtíðinni.