Fjármagnstekjuskattur

Það er mikill munur á skattalegri meðferð á fjárfestingamálmum á Íslandi og í flestum löndum Evrópu. 

Á Íslandi er ekki gerður greinarmunur á fjárfestingagulli eða t.d. skartgripagulli, silfri eða platínu. Samkvæmt íslenskum skattalögum eru þessir málmar flokkaðir sem lausafé þegar um einstaklinga er að ræða og skiptir þá engu hvort um mynt eða stangir er að ræða. Einstaklingar greiða fjármagnstekjuskatt af hagnaði sem myndast við sölu lausafjár ef lausafé er keypt í hagnaðarskyni, en ef ekki er sala lausafjár skattfrjáls. Ef kaup og sala lausafjár er í svo miklu umfangi að um er að ræða atvinnurekstur er hins vegar greiddur almennur tekjuskattur af söluhagnaði en þá er til staðar réttur til frádráttar rekstrarkostnaðar. Hjá fyrirtækjum yrðu þessar eignir eignfærðar á efnahagsreikning á markaðsvirði. Fyrirtæki greiða ekki fjármagnstekjuskatt, þau greiða tekjuskatt fyrirtækja en hafa að sama skapi rétt til að draga frá rekstrarkostnað.

Víða erlendis er einn helsti kostur þess að fjárfesta í bullion-mynt talinn sá að fjárfestingarmynt sem jafnframt er lögeyrir er undanþegin skatti af söluhagnaði þegar íbúar viðkomandi ríkis selja hana.

Fjármagnstekjuskattur er lagður á hagnað sem myndast við sölu hvers kyns eigna. Almennt þarf að greiða skatt af söluhagnaði af eignum sem skattyfirvöld telja skattskyldar. Undir þann flokk falla meðal annars verðbréf, hlutdeildarskírteini í verðbréfasjóðum, þar á meðal gullsjóðum (ETF), bankainnistæður og fasteignir sem teljast ekki vera aðalheimili eigandans.

Ef þú keyptir til dæmis hlutabréf fyrir 1.000.000 kr. og seldir þau síðar fyrir 1.500.000 kr. væri söluhagnaðurinn 500.000 kr. Sá hagnaður myndi mynda stofn til fjármagnstekjuskatts, að teknu tilliti til þeirra skattleysismarka sem kunna að eiga við.

Eins og áður hefur komið fram getur skattlagning við sölu lausafjár af hálfu einstaklinga hér á landi fallið í þrjá meginflokka: skattfrjálsa sölu (0%), sölu sem myndar stofn til fjármagnstekjuskatts (22%) og sölu sem telst hluti atvinnurekstrar (allt að 46% skattur, með rétti til frádráttar rekstrarkostnaðar). Hver sá sem fjárfestir þarf því að meta undir hvaða flokk fjárfestingin fellur með hliðsjón af tilgangi kaupanna, umfangi þeirra og öðrum atriðum. Leiki vafi á skattalegri meðferð er rétt að leita ráðgjafar eða leiðbeininga hjá skattyfirvöldum.